Dagførd trivnaðarætlan fyri Velbastaðar skúla

Góður trivnaður er fyritreytin fyri, at næmingar kunnu læra og mennast.

Vit vilja arbeiða fyri at næmingar

  • Kenna seg tryggar og trívast
  • Vísa virðing hvør fyri øðrum
  • Taka ábyrgd
  • Kenna seg at hoyra til

 

Til at náa omanfyrinevndu málum fokusera vit á hesi kjarnuøki:

Trivna, samstarv-samskifti, næmingasamrøður, eitt kveikjandi umhvørvi, felags upplivingar/sosial tiltøk, heim og skúli.

Trivnaður: Árligt trivnaðartiltak/túrur við denti á trivna og at menna sosialt tilvit og førleikar, har hugtøk sum ábyrgd, vinalag og tann góði skúlin eru á skrá.

Her læra vit at vera saman – øll – í einum sosialt góðum, virðiligum og viðurkennandi umhvørvi. Dentur verður lagdur á, at styrkja sjálvsfatanina og ábyrgdarkensluna hjá hvørjum einstøkum, eins og sannkenningina um, at øll menniskju hava sama rætt til virðing. Vit koma fram til nøkur stevnumið at vera stavnhald fyri samveruna í okkara skúla. Hesi verða tað komandi árið stig á leiðini at menna næmingarnar til sosialt tilivitaðar persónar.

 

Samstarv-samskifti: Læraratoymini í ávísu deildunum hava ábyrgdina av, at trivnaðararbeiðið í teirra deild verður gjørt. Dentur verður lagdur á, at næmingar venja seg at samstarva í skiftandi bólkum og tvørtur um floksmørk. T.d. tá skúlin hevur evnisdag/ar ella –viku.

Næmingasamrøður: Týdningarmikil er at nýta næmingasamrøður til at økja tilvit næminganna um teirra leiklut í egnari læring.

Eitt kveikjandi umhvørvi: Tað góða og mennandi skúlaumhvørvið er ein týdningarmikil viðspælari til góðan trivnað í skúlanum.

Felags upplivingar/sosial tiltøk: Felags upplivingar hava týdning fyri samanhald og trivnað). Gjøgnum skúlaárið verður skipað fyri tiltøkum, sum geva okkum góðar felags upplivingar.

Felags upplivingar er t.d.

  • Trivnaðartúrur
  • Trivnaðarnevnd
  • Sáttmálin/stevna/stevnumið
  • Jólahald
  • Tunnusláing
  • Listaleypurin
  • Útferðir
  • Hugnaløtur
  • Sjónleikur
  • Evnisdagar/vikur
  • Seturskúlar
  • Spælibólkar
  • Onnur tiltøk
  • Ítróttardagar
  • Skúlarenning

Seinastu tvey tiltøkkini eru partur av SSS-samstarvinum, sum er samstarv millum Nólsoyar, Kaldbaks og Velbastaðar skúlar. Hetta er við til at skapa sambond næminganna millum, so tey longu kennast tá tey seinni fara í framhaldsdeild í Havn.

Heim og skúli: Skúlin virkar fyri einum góðum samstarvið við foreldrini og væntar somuleiðis, at foreldrini siga frá, um okkurt er heima ella í skúlanum, sum ávirkar trivnaðin og læruna hjá tykkara barnið, ella eru vitandi um at okkurt annað barn ikki trívist í skúlanum.