Bæði Velbastaðar- og Kaldbaksbørn møttu spent á Bursatanga, har ið Teistin legði at bryggju. Túrurin yvir um fjørðin tók á leið 20 min., og komin yvirum gekk leiðin niðan í Nólsoyar skúla.

Í skúlagarðinum sluppu næmingarnir at spæla eina løtu, áðrenn vit savnaðust til morgunsang í fimleikasalinum. Í Nólsoy syngja tey vanliga tríggjar sangir til morgunsang; ein barnasang, ein sálm og síðan ein enskan sang.

Nú var løtan komin at renna. Rennileiðin var niðri í bygdini. Hon var 1 kilometur til longdar og so ráddi um at renna so nógv sum gjørligt næstu tveir tímarnar. Velbastaðarbørn runnu tilsamans 172 kilometrar - 6,37 kilometrar í miðal.

Áðrenn leiðin gekk innaftur við Teistanum fingu vit sunnkist og karamel, ótu matpakka og hugnaðu okkum í skúlanum.